• Янгиликлар
• 18:15 29.01.2025
• 75
• Очиқ мулоқот

Наманганда ўтказиладиган нуфузли тадбирлар яна биттага кўпаймоқда, шу йилнинг февраль ойида халқаро “Авто Тюнинг” кўргазмаси ташкил этилиши кутиляпти.

Наманган вилояти ҳокими Шавкатжон Абдураззоқов халқаро “Авто Тюнинг” кўргазмасини ташкиллаш масаласида тадбиркорлар билан учрашув ўтказди. Мазкур тадбир автомобил тюнинги саноатини ривожлантириш, хорижий ва маҳаллий сармоядорларни жалб қилиш, шунингдек, автомобил ихлосмандлари учун янги имкониятлар яратиш мақсадида ташкил қилинмоқда.

Учрашувда вилоят раҳбари авто тюнинг соҳасининг жадал ривожланаётганини ва ушбу кўргазманинг Наманган учун муҳим аҳамият касб этишини таъкидлади. 

Унга кўра, кўргазма минтақадаги автомобилсозлик ва автомобил эҳтиёт қисмлари ишлаб чиқарувчиларини бир жойга жамлаб, янги бизнес ҳамкорликлар ва инвестициялар учун замин яратади.

Учрашувда иштирок этганлар халқаро кўргазмани муваффақиятли ўтказиш бўйича ўз таклиф ва фикр-мулоҳазаларини билдирдилар. 

Шунингдек, вилоят ҳокими тадбиркорларни ушбу лойиҳада фаол иштирок этишга чақириб, зарурий инфратузилма ва ташкилотчилик масалаларида маҳаллий ҳокимият томонидан тўлиқ қўллаб-қувватланишини маълум қилди.

Халқаро “Авто Тюнинг” кўргазмасида юртимизнинг барча вилоятларидан ҳамда чет мамлакатлардан етакчи авто тюнинг, автомобилсозлик мутахассислари ва ихлосмандлар иштирок этиши кутилмоқда. Кўргазмада энг сўнгги технологиялар асосида жиҳозланган автомобиллар, эксклюзив модификациялар ҳамда замонавий авто деталлари намойиш этилади.

Янги Наманган тумани ҳокимлиги
Ахборот хизмати